இனியெல்லாம் இலவசமே !!!

சமத்துவபுரத்தில் இலவசமாக கிடைத்த என்னுடைய வீட்டில் இலவசமாக கிடைக்கும் டி.வி சேனல்களில் ஒன்றை பார்த்துக்கொண்டே அமர்ந்திருந்தேன். இலவச அரிசிச்சோறை மனைவி பொங்கிப்போட்டாள்..சாப்பிட்டுவிட்டு சென்ற ஆண்டு பொங்கலுக்கு கொடுத்த இலவச வேட்டியை அப்படியே விரித்து, இலவச சேலையை தலைக்கு முட்டு கொடுத்து சாய்ந்தேன்..பக்கத்தில் 12 ஆம் வகுப்பு படிக்கும் மகனின் இலவச சைக்கிள்..குடும்பக்கட்டுப்பாடு இலவசம் என்று சொன்னபோதே செய்திருக்கலாம்..கொஞ்சம் அசட்டையாக இருந்ததில் நாலு பசங்க...சின்ன பெருமூச்சோடு அப்படியே உறங்கிப்போனேன்..

கொஞ்சநேரத்தில் தடதடவென யாரோ ஓடிவரும் சத்தம்..உலுக்கு உலுக்கென்று உலுக்கி எழுப்புறான் சின்ன மகன்...அப்பா அப்பா ஏந்திரு ஏந்திரு என்கிறான்..என்னடாவென எழுந்து பார்த்தால்...வா...வெளியே என்று கையை பிடிச்சு தெருவுக்கு இழுக்கிறான்...இருடா வர்ரேன் அப்படி என்னடா என்று சொல்லிக்கொண்டே வெளியே வந்தால்...வாசலில் புதிய டொயட்டோ இன்னோவா நிக்குது..டேய் யாருடைய வண்டி இது என்றால்...மூத்தவன் வண்டியை சுற்றி வந்து சொல்கிறான்..இது நம்ம வண்டிதாம்பா..நம்ம இலவச டீவியில் வந்த "காசுமேல" புரோகிராமில வந்த ஒரு கேள்விக்கு என்னோட செல்பேசியில் இருந்து சரியான விடையோட ஒரு குறுஞ்செய்தி அனுப்பினேன்..என் செல்பேசியில் தான் குறுஞ்செய்தி வசதி இலவசமாச்சே...அதில் பரிசு விழுந்து இப்போத்தான் டீவிக்காரன் வண்டியை வீட்டுல கொண்டுவந்து கொடுத்திட்டு போறான்...

ஆகா...இதுவல்லவோ டீவி நிகழ்ச்சி என்று நினைத்துக்கொண்டிருக்கும்போது அடுத்தமகன் புதிய எமஹா எண்டைஸர் வண்டியில் வந்து இறங்குறான்..டேய் உனக்கேதுடா வண்டி என்று கேட்டதற்க்கு, எங்க கல்லூரியில் வகுப்புக்கு காலையில் சீக்கிரமாக வரும் மாணவருக்கு ஒரு டூ வீலர் இலவசம் என்று போட்டி வைத்திருந்தாங்களாம்பா..நான் நேற்று கல்லூரிக்கு போகலை...இன்னைக்கு காலையில் போனவுடன் பிரின்ஸிபால் காலையில் நின்று வரவேற்றார்...நான் போட்டியிலே ஜெயிச்சிட்டேன் என்று இந்த வண்டியை கொடுத்திட்டார் என்றான்...

அய்யோ...இப்படிகூடவா நம்ம மகனுக்கு அதிஷ்டம் அடிக்கனும்..என்று நினைத்துக்கொண்டிருந்தபோது கடைக்குட்டி ஒரு மேங்கோ ஸ்லைஸ் கொண்டுவந்து கொடுத்தான்..ஏதுடா இது என்றதுக்கு...அப்பா, மளிகைக்கடையில் இன்னைக்கு காலையில் பொருள் வாங்குறவங்களுக்கு எல்லாம் ஒரு மேங்கோ ஸ்லைஸ் கூல்டிரிங் இலவசமா கொடுக்கிறார் கடை ஓனர் என்றான்...அட...இவனுமா...

ஆச்சர்யத்தோடு பார்த்துக்கொண்டிருந்த எனக்கு அதை விட மாபெரும் இன்ப அதிர்ச்சி...மனைவி ஒரு இளநீரோடு வெளியே வந்து, இந்தாங்க, ஸ்லைஸ் வேண்டாம், இளநீர் குடிங்க என்றாள்...இளநீர் ஏது...என்றதுக்கு என்னங்க அதுக்குள்ள மறந்துட்டீங்க...நேற்றுதானே அரசாங்கம் நிலமில்லாதவங்களுக்கு 25 ஏக்கர் கொடுக்கிறதா செய்தி வெளியிட்டிருந்தாங்க...காலையில் கிராம நிர்வாக அதிகாரி எல்லாருடைய வீட்டுக்கும் வந்து வீட்டு பத்திரத்தை கொடுத்திட்டு போயிட்டார்...நீங்க தூங்கிக்கிட்டிருந்ததால நானே வாங்கிட்டேன்...கையெழுத்து போட உங்களை சமுதாய கூடத்துக்கு சாயந்திரம் வரச்சொன்னார்...நம்ம நிலம் மாரியம்மன் கோவில்ல இருந்து மெயின் ரோடு வரைக்குங்க..எத்தனை தென்னை மரம்..காலையிலேயே பெரியமகன் போய் இளநீர் வெட்டிக்கிட்டு வந்தான்...என்றது எனக்கு தலை சுற்ற ஆரம்பித்தது...

இலவசம் இலவசம் இலவசம்...எல்லாமே இலவசமா...இனியெல்லாம் இலவசமா...ஆகா...இலவசம்...

ஏங்க...ஏங்க..என்னாச்சு உங்களுக்கு...ஏந்திருங்க...ஏங்க...என்ன ஏதோ தூக்கத்துல பொலம்பிக்கிட்டு இருக்கீங்க...ஏதாவது வேலைக்கு போனாதானே...சாப்புட்டு தூங்கவேண்டியது...ஏங்க...ஏந்திருங்க..

ஒரு சொம்பு தண்ணீரை புளிச் என்று முகத்தில் அடித்தாள்.....போன பொங்கலுக்கு வாங்கிய இலவச வேட்டி நனைந்தது...