லஞ்சத்தின் த்ரீ டைமன்ஷன் ???

லஞ்சத்தை காலம் காலமாக சகித்துக்கொள்ளும் பொதுமக்கள்:

க்யூவில் நிற்க என்னுடைய ஸ்டேட்டஸ் இடம் கொடாது..

என்னுடைய வேலை சீக்கிரமா முடியனும், நான் வெளிநாடு போவனும், எவன் எக்கேடு கெட்டாலும் எனக்கு கவலை இல்லை.

நான் நேர்மையானவனில்லை. என்னிடம் இருக்கிற டாக்குமெண்ட்ஸ் சட்டப்படி செல்லாது. அதனால் சட்டத்துக்கு புறம்பாகத்தான் என்னுடைய காரியத்தை முடிக்கவேண்டும்.

அய்யோ. லஞ்சம் கொடுக்கவில்லை என்றால் என்னுடைய காரியம் நடக்கவில்லை என்றால் ? பயமாருக்கு. என்னுடைய வேலை எனக்கு முக்கியம்.

என்னது, லஞ்சம் கொடுக்கவேண்டாமா ? அவன் மிரட்டி வாங்குறான் சார். என்ன செய்யறது ?

எல்லாரும் கொடுக்கறாங்க. நானும் கொடுக்கறேன். நான் மட்டும் என்ன விதிவிலக்கா சார் ?

அவங்கள எதிர்த்துக்கிட்டு என்ன சார் செய்யமுடியும் ? பேசாம கொடுத்துட்டு போகவேண்டியது தான்.

இது என்ன சினிமாவா ? ரியல் லைப் சார் ரியல் லைப். இந்தியன் தாத்தா படம் எப்பவோ தியேட்டரை விட்டு ஓடிருச்சு..

நாணல் மாதிரி வளைஞ்சு கொடுத்துட்டு போய்ட்டே இருக்கனும்பா. லஞ்சம் கொடுக்க மாட்டேன், முடிச்சு அவுக்கமாட்டேன் அப்படீன்னா கடைசியில படறது நாமதானே ?

போலீஸ்ல சொல்றதா ? ஹி ஹி. அவங்களே வாங்குறாங்களேப்பா.

என்னது லஞ்ச ஒழிப்பு போலீசா ? எவ்ளோ லஞ்சம் கொடுக்கனுமோ அவ்ளோ பணத்தை நாம லஞ்ச ஒழிப்பு போலீசுக்கு கொடுக்கனுமாம். அதுல அவங்க கெமிக்கல் தடவுவாங்களாம். அதை நான் கொண்டுபோயி லஞ்சம் கேக்குற அதிகாரிக்கிட்ட கொடுக்கனுமாம். அப்புறம் அவங்க மறைஞ்சிருந்து அதிகாரிய புடிப்பாங்ககாள். ஆனா என்னோட காசு ஆதாரமா கோர்ட்டுல சம்பிட் பண்றதுக்கு போலீஸ் எடுத்துக்குவாங்களாம். அதுக்கு நான் லஞ்சமே கொடுத்திட்டுபோவனே ? அதே செலவுதானே ?

அடப்போய்யா..எவன் கோர்ட்டு கேசுன்னு அலையறது ? மண்டையில இருக்க கொஞ்ச நஞ்ச முடியும் கொட்டிரும்...வேற ஆளைப்பாரு.

நாம மாட்டிவிடற அதிகாரி, சஸ்பெண்ட் ஆகி, வேலை போய், நாளைக்கு நடுத்தெருவுக்கு வந்துருவான். அப்புறம் கூலிப்படையை வெச்சு மாறுகால் மாறுகை வாங்கிட்டான்னா ? கையும் காலும் என்னுதாச்சே ?



காலம் காலமாக டேபிளுக்கு கீழும் மேலும், தலையை சொறிந்தும், மிரட்டியும், மக்களின் தேவைகளை பயன்படுத்தியும், அதிகாரம் செய்தும், அதிகார துஷ்ப்ரயோகம் செய்தும், "மாசக்கடைசி" என்ற சிங்கிள் வேட்டை பயன்படுத்தி கெஞ்சியும் லஞ்சம் அல்லது கையூட்டு பெற்றுக்கொண்டிருக்கும் அதிகாரிகள், அரசுத்துறையினர்

மூனு லோன், பி.எப் லோன், பிடித்தம் போக சம்பளம் மூவாயிரம் வருது சார். இந்த மூவாயிரத்துல வீட்டு வாடகை கூட கட்டமுடியாது. என்னை ஏன் வாங்கக்கூடாதுன்னு சொல்ற ?

ஒரு பையன் இஞ்சினீயரிங் படிக்கிறான். டொனேஷன் 3 லட்சம் கொடுத்தேன். அட ஹாஸ்டல் பீஸ் அம்பதாயிரம் சார். என்னை என்ன செய்ய சொல்றீங்க ?

ஊருல யாருமே வாங்கலைன்னு சொல்லுங்க. என்னையும் வாங்கவேண்டாம்னு சொல்லுங்க. நான் மட்டும் முட்டாள், ஊர்ல இருக்கறவனெல்லாம் அறிவாளி. அப்படித்தானே ?

தாலி செயின் கொஞ்சம் பெருசா வேணும்னு வீட்ல ரொம்ப டார்ச்சர். நீங்களா பணம் தரப்போறீங்க அதுக்கு ? கை நீட்டித்தான் ஆவனும்.

அம்பது வயசு வரைக்கும் வாங்கலை சார். இன்னும் வாடகை வீடு. காறித்துப்பறா என்னோட பொண்டாட்டி. இனிமேலும் பொறுக்கமுடியாது சார். சொந்தவீட்டுக்கு போயே ஆகனும்.

இன்னைக்கு கோயம்பேட்ல ஒரு கிலோ தக்காளி எவ்ளோ சார் ? என்னோட சம்பளத்தை மட்டும் நம்பிக்கிட்டிருந்தா, வெறும் தக்காளி மட்டும்தான் வாங்க முடியும். அரிசி வாங்க முடியாது.

24 மணி நேரம் டூட்டி பாக்குறோம் சார். வேற எந்த டிப்பார்ட்மெண்ட்ல இப்படி இருக்கு ? சம்பளம் எவ்ளோன்னு தயவு செஞ்சி கேக்காதீங்க. நைட் வாச்மேனுக்கும் எங்களுக்கும் பெரிசா வித்யாசமில்லை.

பேரு தான் பெத்த பேரு. கவுர்மெண்டு ஜீப்பு. பொண்டாட்டி புள்ளைங்கள ஒரு சினிமாவுக்கு ட்ராமாவுக்கு கூட்டிக்கிட்டு போவ முடியல சார். பாப்கார்ன் அம்பது ரூவா. என்ன செய்யச்சொல்றீங்க ?

ஊரே அம்மணமா திரியுது. நான் மட்டும் கோவணம் கட்டிக்கனுமா ? என்னைய பார்த்தா கேனையன் மாதிரி இருக்கா ?

என்னோட படிப்பு செலவுக்கு மொத்தம் பத்து லட்சம் ஆச்சு சார். இந்த ஊர்ல போஸ்டிங் வாங்கறதுக்கு சொளையா மூனு லட்சம் செலவாச்சு. எங்கப்பா வீட்டை வித்திருக்கார். எப்படி சார் அந்த காசை திரும்ப எடுக்கறது ?

மத்தவங்கள மாதிரி ஆயிரம் ரெண்டாயிரம்னு வாங்கறதில்லை சார் நானு. ஏதோ ஒரு நூறு எறநூறு. இல்லாதப்பட்டவங்களுக்கு ப்ரீயாவே செய்யறேன். ஆபீஸ்ல எல்லாருக்கும் டீ வாங்கித்தரச்சொல்லுவேன். ரெண்டு கொயர் பேப்பர், பத்து ரெணால்ட்ஸ் பேனா. இது போயி தப்பா ?

இவனுங்க வேலைக்கு நான் வண்டியில பெட்ரோல் போட்டுக்கிட்டு டாக்குமெண்டை தூக்கிட்டு போறேன். பெட்ரோல் என்ன என் வீட்டு கெணத்துலயா புடிக்கமுடியும் ? அம்பது ரூவா ஆவுதில்ல ? மேல ஒரு 200 போட்டு எறநூத்தம்பதா கேட்டு வாங்கிக்கறேன். இவனுங்க பாஸ்போர்ட்ட வாங்கிக்கினு வெளிநாட்ல போய் லச்ச லச்சமா சம்பாரிப்பானுங்க. நமக்கு ஒரு எறநூத்தம்பது குடுக்கமாட்டானுங்களா ?

என்ன சார் உழைப்பாளி ? நைட் ஷிப்ட்டு ? நைட்டு பண்ணண்டு மணிக்கு பொண்ணுகளோட பைக்ல வருவான். டாக்குமண்ட் இருக்காது. அப்படியே உட்டுடனுமா ? ஐநூறு ரூபாய்க்கு பீர் அடிப்பானுங்க. எனக்கு நூறு ரூபா குடுக்க மூக்கால அழுவானுங்களா ? லைசென்ஸ் இல்லைன்னு கேஸை கோர்ட்டுக்கு இழுத்துக்கிட்டு போனா அவன் ஆயிரம் ரூபா கட்டனும் சார். நான் செய்யறது உண்மையிலேயே பாவப்பட்டு. எங்கிட்ட வந்து லஞ்சம் வாங்காத பஞ்சம் வாங்கதன்னு ? போ சார் வேலைய பாத்துக்கினு.

ஐடிங்கறான். வேலைக்கு போய் ரெண்டு வருசத்துல காரை வாங்கிடுறான். ப்ளாட்டை வாங்கிடுறான். நான் முப்பது வருஷம் சர்வீஸ் பண்ணி இப்பதான் சிட்டி அவுட்டர்ல லேண்டே வாங்கியிருக்கேன். இனிமே அதுல வீடு கட்டனும். பொண்ணுக்கு கல்யாணம் பண்ணனும். நாய் மாதிரி வேலை செஞ்சு டாக்குமெண்டை ரெடி பண்ணி கொடுத்திருக்கேன். ஆயிரம் ரூபாய் குடுக்கறான். வாங்கக்கூடாதா சார் ?

சாப்ட்வேர் கம்பெனி சம்பளம் வேண்டாம். அட்லீஸ்ட் செண்ட்ரல் கவர்மெண்டு சம்பளம் போடச்சொல்லுங்க. லஞ்சமே வாங்காத பெரியவர் கதை தெரியுமில்ல ? பி.எப் அப்ளை பண்ணி மூணு வருசமா பணம் வரலை. பொண்ணு முப்பது வயசுல நிக்குது. அந்தாளை மாதிரி லூசா இருக்கச்சொல்றீங்களா ?

சார். ஏதோ ஆயிரம் ஐநூரு கிடைக்கிறது இந்த ஊர்ல மட்டும்தான் சார். ஏதாவது அத்துவான காட்டுக்கு ட்ராஸ்பர் வந்துட்டா அதுக்கும் வழியில்லை. காற்றுள்ள போதே தூற்றிக்கறோம். இதுல என்ன தப்பு ?

முப்பது வண்டி ஓடுது அவனுக்கு. இந்த எப்.சிக்கு அவன் குடுக்குற ஆயிரம் பிச்சைக்காசு சார் அவனுக்கு. அதை போய் வாங்காதீங்கன்னு சொல்லி எதுக்கு எங்க பொழப்புல மண்ணள்ளி போடறீங்க ?

டாஸ்மாக்குல சரக்கு கூல்ட்ரிங்ஸுன்னு நூறு ரூபாய் ஆயிடும். அதுக்கு பாவம் அவம் பத்து ரூபாய்க்கு சாரயம் குடிச்சுட்டு போறான். அதைப்போய் ரெய்டு பண்ணி எதுக்கு சார் ? விட்டுத்தளுங்க. என்னது சாராய வியாபாரியா ? அவன் வாரம் அஞ்சாயிரம் கட்டுதான். அது மொத்தம் பத்து பேருக்கும் பங்கு பிரிச்சா எனக்கு வெறும் ஐநூறு வரும் சார். அதைப்போயி ? என்னது கள்ளச்சாராயமா ? குடிச்சுட்டு சாவட்டுமே ? நாட்ல மக்கள் தொகை கொறையுதுன்னு வைங்க ஹெ ஹெ.

சார் நீங்க சொல்லுங்க. டெக்னிக்கலா இந்த கவர்மெண்ட் கம்பெனியில செய்யறதை எந்த தனியார் கம்பெனியிலயாவது செய்யமுடியுமா ? சம்பளம் மட்டும் அவங்களோடதுல கால் வாசிதான். ஏன் சார் எங்களுக்கு மட்டும் இப்படி ?

நீங்க நெனைக்கிறமாதிரி ஒரு ஆளுக்கு மட்டும் போறதில்லை சார். மேலிருந்து கீழ வரைக்கும் பங்கு. குரங்கு பங்கு பிரிக்கிற மாதிரி. அதெல்லாம் பெரிய போஸ்ட்ல இருந்தாத்தான் நிறைய கிடைக்கும் சார்.

லஞ்சத்தை ஒழிக்கனுமா ? ப்ளீஸ் கெட்ட வார்த்தை பேசாதீங்க. வெகுமதின்னு சொல்லுங்க. அன்பளிப்புன்னு சொல்லுங்க. ஹோட்டல்ல டிப்ஸ் வைக்கலைன்னா உங்களுக்கு என்ன மரியாதை கிடைக்கும் ? ரெண்டு இட்லிய சர்வ் பண்றதுக்கே ரெண்டு ரூபாய் வைக்குமோது, நாப்பது லட்ச ரூவா வேலைக்கு வெறும் நாலாயிரம் வாங்கினா என்ன சார் தப்பு ?

இருக்கறவன் குடுக்கிறான். உனக்கென்ன பொச்செரிச்சல் ? வேலையை பார்த்துக்கிட்டு போய்யா.

நானும் ஆரம்பத்தில கொஞ்சம் கஷ்டப்பட்டேன். எதிர்த்து கூட பேசினேன். உனக்கு தேவையில்லைன்னா ஒதுங்கிக்கோன்னு சொல்லிட்டாங்க. அதான். நான் ஒதுங்கிட்டேன். என்னளவில் எந்த வேலைக்கும் காசு வாங்குறது கிடையாது. அவ்ளோ தான் என்னால செய்யமுடியும் சார். மத்தபடி இவங்களை போட்டுக்கொடுத்து, வேலைக்கு உலை வெக்கனும்னு எனக்கு ஆசையில்லை. எக்கேடோ கெட்டுபோறாங்க !!



அரசாங்கத்தின் வருமானத்தின் 90 சதவீதத்தை அரசு ஊழியர்களின் சம்பளத்துக்கே செலவு செய்யும், லஞ்ச ஒழிப்புத்துறை என்ற வீக்கான கட்டமைப்பை உருவாக்கி லஞ்சத்தை ஓரளவுக்கு ஒழிக்க முயலும் அரசு

நீங்க கம்ப்ளைண்ட் கொடுங்க சார். அவங்க பார்த்துப்பாங்க. அதுக்குத்தானே தனி டிப்பார்ட்மெண்ட் இருக்கு ?

ஐடி கம்பெனி மாதிரி நாங்க எப்படி சம்பளம் கொடுக்கமுடியும் ? எங்களுக்கு என்ன க்ளையண்ட் அமெரிக்காவிலயா இருக்கான், டாலர்ல கொட்ட ?

அவங்க உங்க வேலையை செஞ்சு கொடுக்கறதே பெரிசு சார். இதுல அதை வாங்காத இதை நோங்காதன்னுட்டு..

நாங்களும் எங்களால முடிஞ்சதை செய்துக்கிட்டு தான் இருக்கோம்.

கவர்மெண்ட்லயே இதை ஸ்ட்ரிக்டா செய்ய சொல்லலை சார். நாங்க என்ன செய்யறது ?

ஆமா. கோர்ட்டு கேஸுன்னா கொஞ்ச நாள் ஆகத்தான் செய்யும். இண்ஸ்டண்டா தீர்ப்பு சொல்ல இது என்ன நூடுல்ஸ் வெவிக்கிற விஷயமா ? புகார் காழ்ப்புணச்சியின் அடிப்படையில கூட இருக்கலாம் இல்லையா ?

நீங்க குடுக்காதீங்க. உங்களை மிரட்டி கேட்டா சொல்லுங்க. மத்தபடி நாட்ல லஞ்சம் வாங்கற எல்லாருக்கும் தண்டன கொடுக்க இது என்ன சினிமாவா ?

உங்க வேலை என்னவோ அதை பாருங்க. பெரிசா சமூக சேவைக்கு கெளம்பிட்டாரு அய்யா...

..

..

..